अध्यादेशको मारमा एमाले : अरुलाई हान्न ताकेको बन्चरो आफ्नै खुट्टामा (भिडियो रिपोर्टसहित)

Himalaya Television
२०७८ भदौ २ गते २०:२२

अध्यादेशको मारमा एमाले : अरुलाई हान्न ताकेको बन्चरो आफ्नै खुट्टामा (भिडियो रिपोर्टसहित)

२ भदौ २०७८ काठमाडौं । सरकारले ल्याएको दल विभाजनसम्बन्धी अध्यादेशको सबैभन्दा ठुलो मार नेकपा एमालेलाई परेको छ ।

यसअघि अन्य दल फुटाउन भन्दै यस्तै अध्यादेश ल्याएका केपी शर्मा ओली नै अहिले नयाँ अध्यादेशको प्रहारमा पर्नुभएको छ । पार्टी विभाजनपछिको असरका कारण एमाले र अध्यक्ष ओलीले अझै धेरै मुल्य चुकाउनु पर्ने संभावना छ ।

तत्कालिन प्रधानमन्त्री केपी शर्मा ओलीले २०७७ साल वैसाख ८ गते दल विभाजन सहज बनाउने गरी अध्यादेश ल्याउनुभयो । दल फुटाउन संसदीय दल र केन्द्रीय समितिमा कम्तिमा ४० प्रतिशत संख्या हुनुपर्ने प्रावधान संशोधन गरेर एकातिर मात्रै भए पुग्ने बनाइएको थियो ।

त्यतिबेला अध्यादेश ल्याउनुका पछाडी ओलीका दुईवटा उदेश्य भएको बताइन्छ । तत्कालिन समाजवादी जनता पार्टीमा विभाजन र अर्को तत्कालिन नेकपाबाट छुट्टिएर आफैले एमाले बनाउने । किनकि तत्कालिन नेकपामा प्रचण्ड नेपाल पक्ष बहुमतमा थियो ओली अल्पमतमा हुनुहुन्थ्यो ।

पार्टी फुटाउन लागेको भन्दै बहुमत पक्षले चर्को आलोचना गरेपछि ओलीले अध्यादेश फिर्ता गर्नुभयो । समाजवादी पार्टी र राजपा मिलेर जनता समाजवादी पार्टी बन्यो । अर्थात त्यतिबेला ओलीले चाहेका दुईवटै उद्देश्य पुरा भएनन् ।

एमाले बनाउने ओलीको चाहना पछि अदालतको आदेशका कारण पुरा भयो । तर पार्टीलाई एकिकृत राख्न भने उहाँ असफल हुनुभयो । प्रधानमन्त्री शेरबहादुर देउवाले ओलीकै पदचाप पछ्याउँदै अहिले अध्यादेश ल्याएर ओली अध्यक्ष रहेको नेकपा एमालेलाई फुटाइदिनु भएको छ ।

पहिले अध्यादेश ल्याउँदा ओली निकट नेताले आफ्नो पार्टी नभई अर्को पार्टी बनाउन अध्यादेश ल्याएको सार्वजनिक रुपमा घोषणा गरेका थिए । त्यतिबेला ओलीले अन्य दलमाथि चलाउन खोजेको बन्चरो अहिले आफ्नै दल एमालेमाथि नै परेको छ ।

करिब दुई तिहाइ मतसहित सरकारको नेतृत्व गरेका ओलीको ओरालो यात्रा कायमै छ । उहाँलाइ प्रधानमन्त्रीबाट हट्नु परेको छ । दुई जना विश्वासपात्र शंकर पोखरेल र पृब्बी सुब्बा गुरुङ मुख्यमन्त्रीबाट बाहिरिनु परेको छ ।

बागमती र प्रदेश १ का मुख्यमन्त्री पनि अब धरापमा परेका छन् । अर्थात कुनै समयका निकै शक्तिशाली व्यक्तित्व केपी शर्मा ओली तत्कालिन नेकपामा विवाद शुरु भएयता निरन्तर खुम्चिनु पर्ने अवस्थाबाट गुज्रनु परेको छ ।

माधवकुमार नेपालले नयाँ पार्टी बनाएपछि कतिपयले अध्यक्ष ओलीलाई अब सहज हुने बताइरहेका छन् । तर अवस्था त्यस्तो देखिँदैन । किनकी अब माधवकुमार नेपालसँग प्रदेश एक र बागमति प्रदेशको सत्ता ढाल्नसक्ने शक्ति छ । केहीदिनमै दुबै मुख्यमन्त्री एमालेले गुमाउनुपर्ने हुनसक्छ ।

पार्टीभित्र पनि उहाँले सोँचेजस्तो सहज नहुने देखिइसकेको छ । पहिले नेपाल खनाल समूहमा रहेका धेरै नेता अहिले पनि पार्टीमै संघर्ष गर्ने भनेर बसेका छन् । उपाध्यक्ष भीम रावल, युवराज ज्ञवाली, अस्टलक्ष्मी शाक्य, उपमहासचिव घनश्याम भुषाल, सचिव गोकर्ण विष्ट, योगेश भट्टराई, नेता सुरेन्द्र पाण्डे एमालेमै बस्नुभएको छ ।

नयाँ पार्टीमा नगएका यी नेताले अध्यक्ष ओलीलाई सच्चाएर एकता कायम गर्न प्रयास गर्ने बताइसकेका छन । अहिले संस्थापन समूहमै रहेका केही नेतासँग मिलेर यीनले पार्टीमा अन्तरसंघर्ष चलाउने तयारी समेत गरिसकेका छन् । त्यसवाहेक विभाजित अवस्थामा चुनावमा जानुपर्ने अवस्थामा अध्यक्ष ओलीले सोंचेजस्तो परिणामा आउने संभावना छैन ।

नेपालको नयाँ दल अन्य पार्टीसँग मिलेर चुनावमा जाने तयारीमा छ । यस्तो अवस्थामा आगामी चुनावमा नेकपा एमालेले ठुलो झट्का व्यहोर्नु पर्ने हुनसक्छ । तर यसका बाबजुद पनि नेकपा एमालेमा लामो समयदेखि चलिरहेको ल्याङ ल्याङ भने तत्कालका लागि सकिएको छ । आगामी दिनमा अध्यक्ष ओलीको रवैया कस्तो हुन्छ त्यसले नै उहाँ र नेकपा एमालेको अवस्था निर्धारण गर्नेछ ।


प्रतिक्रिया

Leave a Reply

Your email address will not be published. Required fields are marked *

Latest Programs