बाँकेमा कोरोनाबाट हुने मृत्यु ह्वात्तै बढ्यो, शव व्यवस्थापनमा समस्या (भिडियो रिपोर्टसहित)
२१ वैशाख २०७८ काठमाडौं । कोरोनाको संक्रमण तिब्र बढेसँगै बाँकेमा कोरोना संक्रमणबाट हुने मृत्युदर पनि ह्वात्तै बढेको छ । पछिल्ला दिनहरुमा दैनिक १० देखि १२ जनाको मृत्यु हुने गरेको छ ।
वैशाख १ गतेदेखि हिजोसम्म कोरोना संक्रमणबाट बाँकेका अस्पतालहरुमा मात्रै १ सय १२ जनाको मृत्यु भएको छ । मृत्यु हुनेमा बाँके जिल्लाका ८१ जना र अन्य जिल्लाबाट बाँकेका अस्पतालहरुमा उपचारका लागि आएका ३१ जना छन ।
२० दिनको अबधिमा बाँकेका अस्पतालहरुमा ४६ जना महिला र ६६ जना पुरुषको मृत्यु भएको छ ।
पछिल्ला दिनहरुमा दैनिक ५ सयको हाराहारीमा संक्रमण हुने गरे पनि डिस्चार्ज हुनेको संख्या भने संक्रमितको तुलनामा आधा मात्र छ ।
बाँकेमा हिजोसम्म सक्रिय संक्रमितको संख्या २ हजार ७ सय ७० पुगेको छ । तीमध्ये ४ सय ८७ जना अस्पताल तथा आइसोलेशन सेन्टरमा भर्ना भएका छन् ।
भर्ना भएकामध्ये १ सयभन्दा बढी सिकिस्त छन् । ९ जनालाई भेन्टिलेटरको सहायतामा उपचार गरिएको छ । संक्रमण तिब्र गतिमा फैलिएर बिरामीको संख्या बढ्दै गएका कारण मृत्यु दर पनि बढ्दै गएको हो ।
संक्रमितहरुको मृत्यु हुने संख्या बढेसँगै नेपाली सेनालाई शव व्यवस्थापन गर्न पनि हम्मेहम्मे पर्न थालेको छ । शव व्यवस्थापनका लागि बाँकेमा एउटा मात्रै शव बाहन छ ।
कोरोना संक्रमितको नेपालगन्जको भेरी र मेडिकल कलेजको शिक्षण अस्पताल कोहलपुरमा उपचार हुने गरेको छ । पछिल्ल्ला दिनहरुमा दैनिक १२ जनासम्मको मृत्यु हुन थालेपछि मृतकका पायक पर्ने स्थानमा शव पुराउन नेपाली सेनाकाको शव व्यवस्थापन टोलीलाई भ्याइनभ्याई भएको छ ।
संक्रमितको मृत्युदर बढेसँगै मृतकका आफन्तले धर्म संस्कृति अनुसार शवको दाहासंस्कार गर्न समेत नसक्ने अवस्था उत्पन्न हुँदै गएको छ ।
प्रतिक्रिया