बाँकेमा बस र टिपर ठोक्किँदा पाँच जनाको मृत्यु, ४१ जना घाइते
४ वैशाख २०७८ बाँके । बाँकेको कोहलपुर नजिकै पूर्वपश्चिम राजमार्गमा हिजो साँझ बस र टिप्पर एकापसमा ठोकिँदा पाँचको मृत्यु हुनुका साथै ४१ जना घाइते भएका छन् ।
सुर्खेतबाट धरानतर्फ जाँदै गरेको मे १ ख ३३४७ नम्बरको यात्रुबाहक बस र कोहलपुरतर्फ आउँदै गरेको अनटेस्ट मालबाहक टिपर साँझ ६ः०० बजे रोहिणी खोला नजिक एकापसमा ठोकिँदा चार पुरुषसहित एक महिलाको मृत्यु भएको इलाका प्रहरी कार्यालय कोहलपुरका प्रमुख प्रहरी नायव उपरीक्षक रविन्द्र खनालले जानकारी दिनुभयो ।
उहाँका अनुसार दुर्घटनामा परी टिपरका चालकसहित दुई र बसमा सवार तीन गरी पाँच जनाको मृत्यु भएको हो । दुर्घटनामा परी मृत्यु हुनेमा बाँके कोहलपुर नगरपालिका–१२ का टिपरका सहचालक २१ वर्षीय उदय बाठा, टिपर चालक सोही स्थानका २५ वर्षीय खगेन्द्रबहादुर सुनार रहेको प्रहरीले जनाएको छ ।
त्यस्तै सुर्खेत साताखानी–७ का ४१ वर्षीय जीवनकुमार विक, बस मालिक झापाको मेची नगरपालिका–१० का ४५ वर्षीय छत्रबहादुर कटवाल र नाम, थर र वतन नखुलेकी एक जना महिलाको पनि मृत्यु भएको प्रहरीले जनाएको छ ।
घाइतेलाई कोहलपुरस्थित शिक्षण अस्पतालमा पु-याइएको छ । अन्य मृतकको अझै सनाखत हुन सकेको छैन । घाइतेमध्ये सातको अवस्था गम्भीर, १४ को मध्यम र २० जनाको सामान्य अवस्था रहेको प्रहरी नायव उपरीक्षक खनालले बताउनुभयो ।
दुर्घटनामा घाइते भएका व्यक्तिको उद्धारका लागि दुई क्रेन र तीन स्काभेटर प्रयोग गर्नुपरेको थियो । पूर्णरुपमा क्षतिग्रस्त बस र टिप्परभित्र रहेका घाइतेको उद्धारकालागि ठुलो सङ्ख्यामा सुरक्षाकर्मी परिचालन गरिएको थियो ।
प्रतिक्रिया