दक्षिण कोरिया सरकारद्वारा पूर्वराष्ट्रपति हाईलाई आम माफी दिने घोषणा

९ पुस २०७८ सिउल । दक्षिण कोरिया सरकारले भ्रष्टाचार मुद्दामा २२ वर्ष जेल सजाय काटिरहेकी पूर्वराष्ट्रपति पार्क गेउन हाईलाई माफी दिएको छ ।

दक्षिण कोरियाका राष्ट्रपति मून जाय इनले हाईलाई क्षमादान दिएको बीबीसीले जनाएको छ । भ्रष्टाचार काण्डमा दोषी ठहर भएपछि हाइ २२ वर्षको जेल सजाय काटिरहेकी थिइन् ।

उनी महाअभियोग लगाएर हटाइने पहिलो निर्वाचित राष्ट्रपतिसमेत हुन् । उनलाई २०१७ मा महाअभियोग लगाइएको थियो ।

हाईलाई सन् २०१८ मा शक्तिको दुरुपयोग गरेर अनैतिक दबाब दिएको अभियोगमा दोषी ठहर गरिएको थियो । उनीमाथि लगाइएका १८ वटा मुद्दामध्ये १६ वटामा दोषी ठहर भएकी थिइन् ।

अब ति सबै मुद्दा खारेज भएका छन् । यसमध्ये अधिकांश मुद्दा घुसखोरी तथा दबाबसम्बन्धी थिए ।