वायु प्रदुषण मानव स्वास्थ्यमा सबैभन्दा ठुलो समस्याः विश्व स्वास्थ्य संगठन

७ असोज २०७८ काठमाडौं । वायु प्रदूषण अहिले मानव स्वास्थ्यका लागि सबैभन्दा ठूलो स्वास्थ्य समस्याको रुपमा देखा परेको विश्व स्वास्थ्य संगठनले जनाएको छ ।

वायु प्रदूषणजन्य समस्याबाट एक वर्षमा विश्वभर ७० लाख मानिसको अल्पायुमै मृत्यु भएको डब्लुएचओको भनाइ छ ।

डब्लुएचओले यसै वर्षदेखि वायु गुणस्तरसम्बन्धी निर्देशिकालाई थप मजबुत बनाउने निर्णय पनि गरेको छ । वायु प्रदूषणको जोखिम कम गर्न तत्काल कदम चाल्नु आवश्यक भएको बताउँदै डब्लुएचओले मानव श्वासप्रश्वासमा देखिने अन्य समस्यामा धूम्रपान र अस्वस्थ्यकर भोजनसँग सम्बन्धित रहेको जनाएको छ।

नयाँ निर्देशिकाले वायु प्रदूषणको प्रतिकूल असरबाट मानिसलाई जोगाउने उद्देश्य राखेको र यसलाई विश्वका सरकारले कडाइपूर्वका कार्यान्वयन गर्नुपर्नेमा डब्लुएचओको जोड छ।

नयाँ दिशानिर्देशअनुसार ओजोन, नाइट्रोजन डाइअक्साइड, सल्फर डाइअक्साइड र कार्बन मोनोअक्साइडलगायत ६ वटा प्रदूषकका लागि वायु गुणस्तरको स्तर सिफारिस गरिएको छ।

डब्लुएचओले सन् २००५ मा अन्तिम पटक वायु गुणस्तरसम्बन्धी जारी गरेको दिशानिर्देशले विश्वमा प्रदूषण कम गर्ने नीतिमा उल्लेखनीय प्रभाव पारेको छ।