भारतले जित्यो अण्डर–१९ एक दिवसीय विश्वकप क्रिकेटको उपाधि

२३ माघ २०७८ काठमाडौं । भारतले उन्नाइस वर्षमुनिको एक दिवसीय विश्वकप क्रिकेटको उपाधि जितेको छ ।

फाइनलमा इंग्ल्याण्डमाथि ४ विकेटको जित निकाल्दै भारत पाँचौ पटक विश्व च्याम्पियन बनेको हो । १ सय ९० रनको लक्ष्य भारतले १४ बल अगावै ६ विकेट गुमाएर भेट्टाएको थियो ।

उसका लागि शेख रशिद र निशान्त सिन्धुले समान ५०(५० रनको अर्धशतकीय इनिंग्स खेले ।

त्यस्तै राज बावाले ३५ तथा हरनुर सिंहले २१ रन जोडे । बलिङमा इंग्ल्याण्डका जोसुआ बेडेन, जेम्स सेल्स र थोमस एस्पिनवेलले समान २(२ विकेट लिए ।

यसअघि टस हारेर पहिले ब्याटिङ गरेको इंग्ल्याण्ड ४४ दशमलव ५ ओभरमा १ सय ८९ रनमा अलआउट भएको थियो ।

इंग्ल्याण्डका लागि जेम्स रिउले ९५ रन बनाए । भारतका राज बावाले ५ तथा रवी कुमारले ४ विकेट लिए । बावा म्यान अफ द म्याच चुनिए ।