ए डिभिजन लीग फूटबलमा मछिन्द्र, मनाङ र आर्मीलाई सफलता

२४ पुस २०७८ काठमाडौं । साविक विजेता मछिन्द्र फूटबल क्लब, मनाङ मर्स्याङ्दी फूटबल क्लब र त्रिभुवन आर्मी फूटबल क्लबले सहिद स्मारक ए डिभिज लीगअन्तर्गत आजको खेलमा जित निकालेका छन् ।

त्रिपुरेश्वरस्थित दशरथ रंगशालामा भएको खेलमा एएफसी छनोट कपमा योग्य भइसकेको मछिन्द्रले तालिकाको पुछारमा रहेको फ्रेन्ड्समाथि १–० को जित निकाल्दा पोखरा रंगशालामा घरेलु टोली मनाङले च्यासल युथ क्लबलाई ५–० ले हराउँदा आज सुखद नतिजा निकालेका हुन् । यस्तै दशरथ रंगशालामा नै भएको दिनको दोस्रो खेलमा त्रिभुवन आर्मी फूटबल क्लबले न्यूरोड टिम (एनआरटी)लाई १–० ले हराएको छ ।

शीर्ष स्थानमा रहेको मछिन्द्रले तालिकाको पुछारमा रहेको फ्रेन्ड्सविरुद्ध अंक खोस्न आत्मघाती गोल कुर्नु परेको थियो । सुरुआतबाट नै दबाब दिएर खेलेको मछिन्द्रले केही अवसर पाए पनि सदुपयोग गर्न असफल भएको थियो ।

पहिलो हाफ गोलरहित बराबरीमा सकिएको खेलमा मच्छिन्द्रले दोस्रो हाफमा अग्रता पाएको थियो । ६८औं मिनेटमा फ्रेन्ड्सका डिफेन्डर रोनिल एन्थोनी पाउलले आत्मघाती गोल गरेपछि पाएको अग्रता नै मछिन्द्रका लागि पर्याप्त बनेको थियो ।

मछिन्द्रका कप्तान सुजल श्रेष्ठको क्रसमा सुशील कुमार थापाले हेड गरेपछि प्राप्त बल क्लियर गर्ने क्रममा रोनिलले आफ्नै पोस्टमा गोल गरेका थिए । जितसँगै मछिन्द्रले ८ खेल २० अंक जोडेको छ । र, मछिन्द्र शीर्ष स्थानमा यथावत रहेको छ । फ्रेन्ड्स ३ अंक जोडेर पुछारमा रहेको छ । फ्रेन्ड्स जारी लीगमा जित निकाल्न नसक्ने एक्लो टोली यथावत छ ।

पोखरा रंगशालामा च्यासल युथ क्लबलाई पराजित गर्ने क्रममा मनाङ मर्स्याङ्दीले गोलको बर्षा नै ग¥यो । च्यासल युथ क्लबमाथि ५–० फराकिलो जित निकालेको हो । तालिकाको दोस्रो स्थानमा रहेको मनाङले ठुलो अन्तरले हराउने क्रममा आफिज ओलावालेले ह्याट्रिक गोल गरे । यस्तै एडिलाजा सोमिडे र दिनेश राजवंशीले एकएक गोल गरे ।

मनाङले पहिलो हाफमै दुई गोल गरेको थियो भने दोस्रो हाफमा थप तीन गोल गरेको थियो । पोखरा रंगशालालाई घरेलु मैदान बनाएको मनाङले यस सिजन तीन खेल खेलेको हो । जसमा मनाङ तीनै खेलमा सुखद नतिजा निकाल्दै मनाङले उपाधि होडलाई कायमै राखेको छ ।

मनाङले यस अघि नेपाल पुलिस र ब्रिगेड ब्वाइजलाई पोखरा रंगशालामा हराएको थियो । जितसँगै मनाङले ८ खेलमा १९ अंक जोडेको छ । मनाङ दोस्रो स्थानमा यथावत रहेको छ । च्यासलले ८ खेलमा ५ अंक जोडेको छ । च्यासल लिगको १३ औं स्थानमा रहेको छ ।

उपाधि होडलाई कायम राख्न जित्ने पर्ने दबाबका साथ मैदान उत्रिएको आर्मीले सुरुआतबाट नै एनआरटीलाई दबाबमा राखेको थियो । सोही क्रममा आर्मीलाई जित दिलाउन दिनेश हेन्जनले गरेको निर्णायक भएको थियो । दिनेशले खेलको १७ औं मिनेटमा गोल गर्दै आर्मीलाई जित दिलाएका हुन ।

जगजित श्रेष्ठको क्रसमा अनमार्क रहेका दिनेशले हेडर मार्फता जाली चुमाउन सफल भएका थिए । यस जितसँगै आर्मीले ८ खेलमा १४ अंक जोडेको छ । लिगमा अपराजित आर्मी लिगको चौंथो स्थानमा रहेको छ । यस्तै एनआरटीले ८ खेलमा १० अंक जोडेको छ । एनआरटी सातौं स्थानमा रहेको छ ।

लिगमा आइतबार एक मात्र खेल हुनेछ । थ्रि स्टार क्लब र हिमालयन शेर्पाबीच हुने खेल दशरथ रंगशलामा हुनेछ ।