असन्तुष्टलाई मनाउने ओलीको प्रयास जारी, नेताहरुसँग एक्लाएक्लै भेट

२४ वैशाख २०७८ काठमाडौं । विश्वासको मत लिने दिन नजिकिँदै जाँदा प्रधानमन्त्री एवम नेकपा एमालेका अध्यक्ष केपी शर्मा ओलीले असन्तुष्ट पक्षलाई मनाउने प्रयास जारी राख्नुभएको छ ।

नेपाल खनाल समूहका नेताहरुलाई एक्लाएक्लै भेटेर प्रधानमन्त्री ओलीले फकाउने प्रयास गर्नुभएको छ । यसैक्रममा प्रधानमन्त्री ओलीले आज नेता गोकर्ण विष्टसँग भेटवार्ता गर्नुभएको छ ।

प्रधानमन्त्रीले विष्टलाई बालुवाटार बोलाएर भेट्नुभएको हो । विष्टले हिजो दिउँसो ओली निकट नेता विष्णुप्रसाद पौडेलसँग पनि कुराकानी गर्नुभएको थियो ।

ओलीसँग नेपाल खनाल समूहका नेता एवं सांसद घनश्याम भुसाल र योगेश भट्टराईले छलफल गर्नुभएको थियो । तर सहमति भने हुन सकेको छैन ।

वैशाख २७ मा संसदमा विश्वासको मत लिने भएपछि प्रधानमन्त्री ओलीले एमालेका दोस्रो तहका नेतासँग भेटघाट तीव्र पार्नुभएको छ ।