धादिङमा रोकिराखेको ट्याक्टरमा मोटरसाइकल ठोक्किँदा एकजनाको मृत्यु

२२ कात्तिक २०८० धादिङ । धादिङमा रोकिराखेको ट्याक्टरमा मोटरसाइकल ठोक्किँदा एकजनाको मृत्यु भएको छ भने एकजना घाइते भएका छन् ।

त्रिपुरासुन्दरी गाउँपालिका–२, माझगाउँमा सिक्टारबाट रानीपौवातर्फ जाँदै गरेको बा ५० प ७१३८ नम्बरको मोटरसाइकल मंगलबार राति अनियन्त्रित भइ सडक छेउमा रोकी राखेको ट्याक्टरमा ठोक्किएको थियो ।

दुर्घटनामा मोटरसाइकलको पछाडि सवार त्रिपुरासुन्दरी गाउँपालिका–१ का २२ वर्षीय रोशन परियारको मृत्यु भएको छ । दुर्घटनामा घाइते भएका उनको प्राथमिक स्वास्थ्य चौकी सल्यानटारमा सामान्य उपचारपश्चात जिल्ला अस्पताल धादिङबेसीमा लगिएकोमा उपचारका क्रममा मृत्यु भएको जिल्ला प्रहरी कार्यालय धादिङका प्रहरी प्रमुख एसपी गौतम मिश्रले जानकारी दिनुभयो ।

घाइते भएका मोटरसाइकल चालक २२ वर्षीय सन्जिव श्रेष्ठको धादिङबेसीमा उपचार भइरहेको मिश्रले जानकारी दिनुभयो ।