कोशी प्रदेशसभाको चालु अधिवेशन अन्त्य

७ भदौ २०८० विराटनगर । कोशी प्रदेशको प्रदेश सभाको चालु अधिवेशन अन्त्य गरिएको छ ।

मन्त्रिपरिषद्को सिफारिसमा प्रदेश प्रमुख पर्शुराम खापुङले राति १२ बजेदेखि लागू हुने गरी प्रदेश सभा अन्त्य गर्नु भएको हो ।

नेकपा एमालेले संसद् चल्न नदिने देखिएपछि सरकारले अधिवेशन अन्त्य गर्न सिफारिस गरेको हो । सरकारले बजेटसम्बन्धी अध्यादेश ल्याउने तयारी गरेको छ ।

गएको सोमबार मुख्यमन्त्री उद्धव थापाले सभाको अध्यक्षता गरेका इस्राइल मन्सुरीको समेत मत जोडेर विश्वासको मत लिनु भएको थियो । त्यसको विरोधमा एमालेले संसद् अवरुद्ध गरेको थियो ।