एमालेको अवरोधपछि प्रतिनिधि सभाको बैठक स्थगित
२६ साउन २०८० काठमाडौं । प्रमुख प्रतिपक्षी नेकपा एमालेले आज पनि प्रतिनिधि सभा र राष्ट्रिय सभाका दुबै बैठकमा अवरोध गरेको छ ।
एक सय किलो सुन तस्करी प्रकरणको छानबिनको लागि उच्चस्तरीय समिति गठन नभएसम्म सदन चल्न नदिने एमालेको अडान छ ।
प्रतिनिधिसभा बैठकको सुरुमै एमालेका सांसदहरुले अवरोध गरेपछि सत्तापक्षका सांसदहरुले पनि उठेर बोल्न नदिने रणनीति लिएका थिए ।
्
एमालेकी सांसद ज्वालाकुमारी साहलाई सभामुख देवराज घिमिरेले बोल्न समय दिएपछि सत्तापक्षका सांसदहरुले त्यसलाई अवरोध गर्ने रणनीतिका साथ उठेर बिरोध जनाए। सत्तापक्षमा सांसदहरुले उठेपछि एमालेका सांसदहरुले वेल घेराउ गर्दै सरकार र सत्तापक्षबिरुद्ध नाराबाजी गरेका छन् ।
एमालेका सांसदहरुले नाराबाजी गरेपछि साउन २९ गतेसम्मका लागि बैठक स्थगित गरिएको हो ।
यसअघि राष्ट्रियसभा बैठक पनि एमालेको अवरोधको कारण नियमित कार्यसूचीमा प्रवेश गर्न सकेन । बैठकमा समसामयिक विषयमा सदस्यहरुले धारणा राखिसकेपछि अध्यक्ष गणेशप्रसाद तिमिल्सिनाले नियमित कार्यसूचीमा प्रवेश गराउँदा एमाले सांसदहरुले अवरोध गरेका हुन ।
राष्ट्रियसभाको अर्को बैठक साउन ३१ गते दिउँसो बस्नेछ । एमालेले साउन १० गतेदेखि सदन चल्न दिएको छैन ।
प्रतिक्रिया