कांग्रेस केन्द्रीय समिति बैठक आज सकिँदै
१० साउन २०८० काठमाडौं । नेपाली कांग्रेसको केन्द्रीय समितिको बैठक आज सकिँदैछ ।
दिउँसो ४ बजे पार्टी केन्द्रीय कार्यालय सानेपामा बस्ने बैठकमा सभापति शेरबहादुर देउवाले जवाफ दिने तयारी छ।
केन्द्रीय समितिको बैठकले गर्ने निर्णयलाई अन्तिम टुंगो लगाउन बिहान ११ बजे पदाधिकारीको बैठक बस्दै छ ।
यसअघि हिजो पनि सभापति देउवा निवास धुम्बाराहीमा बसेको पदाधिकारी बैठकले निर्णयको मस्यौदा तयार पार्ने जिम्मा दिएको थियो । पदाधिकारी बैठकमा मस्यौदा पेश हुनेछ ।
त्यसपछि सभापति र महामन्त्रीद्वयले निर्णयको मस्यौदालाई अन्तिम रुप दिएर अनुमोदनका लागि केन्द्रीय समिति बैठकमा प्रस्तुत गर्नेछन् । कांग्रेसको केन्द्रीय समितिको बैठक साउन २ गते शुरु भएको थियो ।
बैठकमा महामन्त्रीद्वय विश्व प्रकाश शर्मा र गगन थापाले पार्टीको एक वर्षे कार्ययोजना प्रस्तुत गरेका थिए । केन्द्रीय सदस्यहरुले समसामयिक राजनीतिका साथै कार्ययोजनामा विभिन्न सुझाव प्रस्तुत गरेका थिए ।
केन्द्रीय सदस्यहरुको सुझावको आधारमा आजको बैठकमा महामन्त्रीले संशोधित कार्ययोजना पनि पेश गर्नेछन् ।
प्रतिक्रिया