काठमाडौं महानगरको निर्णयले यात्रुलाई सकस (भिडियो रिपोर्टसहित)

२४ जेठ २०८० काठमाडौं । सडक व्यास्थापन गर्ने उद्देश्यका साथ काठमाडौं महानगरपालिकाले असार १ बाट लागु हुने गरि सवारी नीति ल्याउँदैछ ।

जस्को बारेमा सूचना समेत प्रकाशित गरिएको छ । तर, महानगरको यो नीतिमा यात्रुलाई भने झन समस्या, मानसिक तनाब र खर्च बढाउने भएको छ । कुनै निजी कम्पनीको स्वार्थमा महानगरले निर्णय लिएको त होइन, शंका गर्न थालिएको छ ।

तपाई बाहिरबाट काठमाडौं आउँदै हुनुहुन्छ ? तपाई बस्ने कलंकी हो भने पर्खनुस् । असार १ गतेबाट तपाई नयाँ बसपार्क जानै पर्छ । यही उर्दी काठमाडौं महानगरपालिकाले जारी गरेको छ । कलंकी मात्र होइन पूर्वतिरबाट तपाई आउँदै हुनुहुन्छ तर बस्नुहुन्छ कोटेश्वर, अहँ तपाई कोटेश्वर ओर्लिन पाउनुहुन्न ।

उपत्यका बाहिर जान पनि तपाईं बसेकै ठाउँबाट गाडी चढ्न मिल्दैन, नयाँ बसपार्क जानैपर्छ । यो काठमाडौं महानगरपालिकाले लगाएको नयाँ नियम हो । अर्थात असार १ गतेबाट काठमाडौं उपत्यकाबाहिर जाने–आउने कुनै पनि सार्वजनिक यातायात नयाँ बस पार्कबाट मात्र छुट्ने छन् भने ओर्लिन पनि नयाँ बस पार्क नै पुग्नुपर्नेछ ।

महानगरको सूचनाका अनुसार असार १ देखि यी तीन कुरा गर्न पाइँदैन ।

१. काठमाडौं महानगरपालिका क्षेत्रभित्रबाट उपत्यका बाहिर लामो मध्यम तथा छोटो दूरीमा सञ्चालन हुने यात्रुबाहक सवारी साधान नयाँ बसपार्क गोगंबुबाट मात्रै छुट्नु पर्ने ।

२. बसपार्कभन्दाबाहिर रहेका सबै टिकट काउन्टर हटाउनु पर्ने ।

३. धुलिखेल, बनेपा, साँखुसम्मको सडक इजाजत पत्र लिएका लामो दूरीका सवारी साधनले कलंकीदेखि जडीबुटीसम्म सवारी रोक्न नपाउने ।

सूचनाको बर्खिलाप गरे महानगरले ट्राफिक प्रहरीसँगको समन्वयमा महानगरपालिका प्रहरीबाट नियमानुसार कारबाही हुने जनाएको छ । महानगरको यो निर्णयले यात्रुहरु चिन्तित छन ।

यातायात व्यवसायी र यससँग जोडिएका कामदार महानगरले आफूहरुको पेटमा लात मारेको टिप्पणी गर्छन् । त्यत्तिमात्रै हैन महानगर कुनै अमूक व्यवसायीलाई पोस्न लागिपरेको उनीहरुको आरोप छ ।

हामीले यात्रु र व्यवसायीको पीडासहित गएर महानगरपालिकासँग प्रश्न गर्‍यौं– तपाँईहरुले यात्रु र यातायात व्यवसायी मारा निर्णय किन गर्नुभयो ?

महानगरले बसपार्कभन्दा बाहिर यात्रुलाई पिक एण्ड ड्रपको सुविधा पनि नदिने गरी सूचना निकालेको छ । के महानगरले यात्रुको व्यवहारिक पाटो नहेरेकै हो त ?

महानगरले निजी कम्पनी लोत्सेलाई पोस्ने गरी सम्झौता गरेको आशंका छ । महानगरले थालेको यातायात व्यवस्थापनको कामले यात्रुलाई सास्ती र सीमित व्यापारिक समूहलाई पोस्ने काम नहोस् । यो नीतिमा महानगर एक पाइला अघि बढ्दा दुई पाइला पछि हट्नुपर्ने अवस्था नआओस ।