अमेरिका नेपालीमाथि अपराध, चिन्तित प्रवासी

काठमाडौं : अमेरिका, जो अवसर र सुरक्षित जीवनको सपना देख्ने लाखौं नेपालीको गन्तव्य हो, पछिल्लो समय नेपाली समुदायका लागि त्रासदीपूर्ण घटनाहरूको केन्द्र बन्दै गएको छ। हालैका केही घटनाहरूले अमेरिकी समाजमा नेपालीहरूको सुरक्षाको सवाललाई गम्भीर रुपमा उठाएको छ।

सुरक्षित भनिएको देशमा यही वर्ष मात्रै दुई नेपालीको मृत्यु र एक बेपत्ता भए । दुई वटा घटनामा गोली चलेको छ भने एउटा घटना घरेलु हिंसाको शिकार भनिएको छ । तर यसले सबैले देखेको सुरक्षित अमेरिकामा नेपाली भने असुरक्षित बन्दै गएको हो कि भन्ने चिन्ता चुलिएको छ ।

घटना- १
-साउन १४ गते
ह्युस्टनस्थित ग्याँस स्टेशनमा कार्यरत रुकुम पश्चिमका दीपक ओलीको गोली हानी हत्या

घटना- २

-भदौ १२ गते

ह्युस्टनमै नेपाली विद्यार्थी मुना पाण्डेको आफ्नै अपार्टमेन्टमा गोली हानी हत्या
-पाण्डेको हत्याअघि अमेरिकामा ममता भट्टको विषयले डायस्पोरामा ठूलो हलचल
-भट्टका श्रीमान हत्या गरेर शव लुकाएको आरोपमा पक्राउ
-अमेरिकामा हुने अपराधका घटनामा नेपालीहरूको संलग्नता र तिनका शिकार बन्ने घटना बढ्दै

साउन १४ गते ह्युस्टनमा रहेको ग्याँस स्टेशनमा कार्यरत रुकुम पश्चिमका दीपक ओलीको गोली हानी हत्या गरियो। अवैध रूपमा अमेरिका पुगेका दीपकको हत्या उनको परिवारका लागि मात्र नभई सम्पूर्ण नेपाली समाजका लागि ठुलो आघात बन्यो।
भदौ १२ गते ह्युस्टनमै नेपाली विद्यार्थी मुना पाण्डेको आफ्नै अपार्टमेन्टमा गोली हानी हत्या गरियो। उनी सन् २०२१ मा स्नातक अध्ययनका लागि अमेरिका गएकी थिइन्।

यी दुबै घटनाले नेपालीहरूको सुरक्षाको सवाललाई गम्भीरतापूर्वक लिनुपर्ने आवश्यकता औंल्याएको छ। अमेरिकामा नेपालीहरूको बढ्दो बसोबास र तिनीहरूमा आएको जोखिमबीचको सम्बन्धलाई नयाँ दृष्टिकोणले हेर्नुपर्ने समय आएको छ।
पाण्डेको हत्याअघि देखि अमेरिकामा ममता भट्टको विषयले डायस्पोरामा ठूलो हलचल मच्चियो । लामो समयदेखि हराईरहेकी भट्ट र उनको खोजीका लागि नेपालीले गरेको प्रयासका बीच अन्तत: प्रहरीले भट्टका श्रीमानलाई हत्या गरेर शव लुकाएको आरोपमा पक्राउ गरेको छ ।

वाशिंगटनको मनासस पार्कमा भएको अर्को घटना नेपाली समाजको आन्तरिक समस्यालाई उजागर गर्छ। ममता काफ्ले भट्टको रहस्यमय मृत्यु र यससँग सम्बन्धित कानुनी प्रक्रियाले घरेलु हिंसाको सम्भावनालाई औंल्याएको छ। नरेश भट्टमाथि हत्या गरेको आरोप लगाइए पनि कानुनी प्रमाणहरूको अभावमा उनलाई हत्या अभियोगमा दोषी ठहर्याउन कठिनाइ भएको देखिन्छ। तर, अदालतले उनीमाथि थप अनुसन्धान गर्न आवश्यक ठानेको छ। यस घटनाले नेपाली समाजमा महिला हिंसाको जोखिमलाई पनि सतर्क गराएको छ।
अमेरिकामा भएका सबै सही हुन्छन् भन्ने छैन । त्यसैले विदेशी भूमिमा सन्तान सुरक्षित हुन्छन् भन्नेमा ढुक्क हुन नमिल्ने यो घटनाले प्रमाणित गरेको छ । भट्टको शव भेटिएको छैन । प्रहरीले उनलाई मृत घोषित पनि गरेको छैन । तर भट्टका बुवा-आमा नेपालमा असह्य पीडामा बसिरहेका छन् ।

यी घटनाहरूले नेपाली समुदायमा बढ्दो असुरक्षालाई संकेत गरेको छ। विशेषगरी, अमेरिकामा हुने अपराधका घटनाहरूमा नेपालीहरूको संलग्नता र तिनका शिकार बन्ने घटना बढ्दै गएको देखिन्छ। नेपालीहरूको सुरक्षामा ध्यान दिनुपर्ने र उनीहरूलाई सुरक्षित राख्नुपर्ने जिम्मेवारी अमेरिकी समाज र सरकारको हो।

अमेरिकामा बस्ने वा बस्ने तयारी गरिरहेका नेपालीहरूले आफ्नो सुरक्षालाई प्राथमिकता दिनुपर्ने देखिन्छ। अमेरिकामा सुरक्षाको मुद्दामा जागरूकता बढाउन आवश्यक छ। नेपाली समुदायमा सूचना, सचेतना र सुरक्षा उपायहरू लागू गर्नु अत्यावश्यक छ। अमेरिकी दूतावासबाट नेपालीको सुरक्षाका लागि त्यति धेरै मिहिनेत भएको पाइँदैन ।