बिशेष

कोशी प्रदेशका मुख्यमन्त्री कार्कीले पाए विश्वासको मत

पक्षमा ८६, विपक्षमा राप्रपाको ५ मत

हिमालय टिभी
२०८० कार्तिक १ गते १७:२९
कोशी प्रदेशका मुख्यमन्त्री कार्कीले पाए विश्वासको मत

१ कात्तिक २०८० काठमाडौं । कोशी प्रदेशका मुख्यमन्त्री केदार कार्कीले दुई तिहाइ बढी विश्वासको मत प्राप्त गर्नुभएको छ ।

कांग्रेसबाट विद्रोह गरेर नेकपा एमालेसँग समीकरण बनाइ मुख्यमन्त्री बनेका उनले प्रदेशसभामा रहेकामध्येबाट दुई तिहाइबढी मत प्राप्त गर्नुभएको हो । ९३ सदस्यीय प्रदेशसभामा मुख्यमन्त्री कार्कीको पक्षमा ८६ मत पर्‍यो भने विपक्षमा ५ जनामात्रै रहे ।

राप्रपाका एक सांसद अनुपस्थित रहे । संविधानको धारा १६८ (५) अनुसार मुख्यमन्त्री बनेका कार्कीलाई कांग्रेस, एमाले, माओवादी केन्द्र, नेकपा एकीकृत समाजवादी र जसपाले विश्वासको मत दिएका हुन् ।

कोशीमा एमालेको उपसभामुखसहित ४०, कांग्रेसको २८, माओवादी केन्द्रको १३, नेकपा एसको ४ र जसपाका एकजना सांसद छन् । गत शनिबार कार्की मुख्यमन्त्री नियुक्त हुनुभएको थियो ।

कोशीमा शेखर कोइराला पक्षका ८ सांसदले विद्रोह गरेर एमालेसँगको समीकरणमा कार्कीलाई मुख्यमन्त्रीको रूपमा अघि सारिएको थियो । तर, कार्की नियुक्त भएपछि गठबन्धनकै साझा मुख्यमन्त्री भन्दै प्रधानमन्त्री प्रचण्डले घोषणा गर्नुभएको थियो ।

त्यसैले गठबन्धनमा आबद्ध भएका दलहरूले कार्कीलाई मत दिने निर्णय गरेका थिए ।

प्रतिक्रिया

Leave a Reply

Your email address will not be published. Required fields are marked *

यो पनि पढनुहोस्