प्रधानमन्त्री देउवा आज भारत भ्रमणमा जाँदै

१८ चैत २०७८ काठमाडौं । प्रधानमन्त्री शेरबहादुर देउवा आज तीन दिनको भारत भ्रमणमा जाँदै हुनुहुन्छ ।

प्रधानमन्त्री देउवा नेतृत्वको प्रतिनिधिमण्डल नेपाल वायुसेवा निगमको नियमित उडानबाट दिउँसो सवा एक बजे नयाँ दिल्ली प्रस्थान गर्नु हुनेछ ।

भ्रमण टोलीमा देउवा पत्नी आरजुसहित परराष्ट्रमन्त्री नारायण खड्कालगायत मन्त्री, सचिव तथा पदाधिकारी छन् । त्यस्तै सरकारी उच्च अधिकारी, उद्योगी व्यवसायी, सञ्चारकर्मी गरी करिब ५० जना सहभागी हुनेछन् ।

प्रधानमन्त्री देउवालाई दिल्ली विमानस्थलमा भारतीय विदेशमन्त्री डा. एस जयशंकरले स्वागत गर्ने कार्यक्रम छ । देउवाले आजै अपरान्ह साढे चार बजे विदेशमन्त्री जयशंकरसँग दिल्लीस्थित होटल मौर्यमा भेटवार्ता हुनेछ ।

देउवाले आजै नेपाली राजदूतावासमा नेपाली समुदायलाई सम्बोधन गर्ने कार्यक्रम पनि तय भएको छ ।