भोलिदेखि देशका विभिन्न ठाउँमा वर्षासँगै हिमपातको सम्भावना
३० असोज २०७८ काठमाडौं । भोलिदेखि देशका विभिन्न ठाउँमा वर्षासँगै हिमपातको सम्भावना रहेको मौसमविद्ले बताएका छन् ।
भारतको आन्ध्र प्रदेश तथा ओडीसाको तटीय क्षेत्र आसपास रहेको न्यून चापीय प्रणाली र विकसित हुँदै गरेको पश्चिमी वायुको संयुक्त प्रभावले भोलिदेखि देशका विभिन्न ठाउँमा वर्षासँगै हिमपातको सम्भावना रहेको मौसम पूर्वानुमान महाशाखाका मौसमविद् शान्ति कँडेलले जानकारी दिनुभयो ।
उहाँका अनुसार यसकै प्रभावले आज पहाडी भेगका एकदुई ठाउँमा हल्का पानी पर्ने सम्भावना छ । आजको भन्दा भोलिदेखि मौसम खराब हुँदै जाने उहाँले जानकारी दिनुभयो ।
उहाँका अनुसार भोलिदेखि तीन चार दिन देशका विभिन्न ठाउँमा मेघगर्जन, चट्याङ् र हावाहुरीसहित पानी पर्ने सम्भावना छ ।
उच्च पहाडी तथा हिमाली भू्भागहरूमा हिमपातको सम्भावना रहेको पनि उहाँले जानकारी दिनुभयो । पानीसँगै हिमपात पनि हुने भएकाले यात्रा र खेती गर्दा विशेष ख्याल गर्न मौसमविद् कँडेलको सुझाव छ ।
प्रतिक्रिया