मन्त्री बनेको १५ दिन पनि नपुग्दै पदबाट राजीनामा
१६ भदौ २०७८ काठमाडौं । बागमती प्रदेशका सामाजिक विकासमन्त्री कृष्णप्रसाद शर्मा खनालले १५ दिन नपुग्दै पदबाट राजीनामा दिनुभएको छ ।
नेकपा एमालेकातर्फबाट मन्त्री बनेका खनालले माधव नेपाल नेतृत्वको नेकपा (एकीकृत समाजवादी) पार्टी रोजेपछि आज मन्त्रीबाट राजीनामा दिनुभएको हो ।
खनालले राजीनामा दिएपछि अब बागमती प्रदेश सरकारमा मुख्यमन्त्री अष्टलक्ष्मी शाक्यसहित आन्तरिक मामिला तथा कानून एवं भौतिक पूर्वाधार विकासमन्त्री केशवराज पाण्डे मात्र रहनुभएको छ ।
खनालसहितका बागमती प्रदेशसभाका १२ सदस्यले निर्वाचन आयोगको प्रदेश कार्यालयमा पुगेर नेकपा एकीकृत समाजवादी रोजेका थिए ।
निवर्तमान मन्त्री खनालले मुख्यमन्त्रीलाई काम गर्न सहज होस् भनेर राजीनामा बुझाएको बताउनुभएको छ । मुख्यमन्त्री र आफ्नो दल फरक परेकाले आज बिहान राजीनामा दिएको खनालको भनाइ छ ।
पार्टी फुटको तहसम्म पुग्दा एउटै विचार समूहमा रहेका मुख्यमन्त्री अर्को समूहमा लागेपछि राजीनामा दिएको खनालले प्रतिक्रिया दिनुभयो ।
प्रतिक्रिया