एकीकृत समाजवादीका अध्यक्ष नेपालले ओलीमाथि लगाए यस्ता आरोप (भिडियो रिपोर्टसहित)

१३ भदौ २०७८ काठमाडौं । नेकपा (एकीकृत समाजवादी) पार्टीका अध्यक्ष माधवकुमार नेपालले केपी शर्मा ओलीकै कारण देश समस्यामा परेको भन्दै चर्को आलोचना गर्नुभएको छ ।

पार्टी संसदीय दलको बैठकमा बोल्दै नेपालले प्रधानमन्त्री हुँदा ओलीले खेलेको भूमिकाको चर्को आलोचना गर्नुभएको हो । ओलीमाथि नेपालले भ्रष्टाचारीको संरक्षकदेखि विदेशीका सामू समर्पण गरेकोसम्मका आरोप लगाउनुभएको छ ।

पार्टी विभाजन भएपछि केही दिनयता एमाले अध्यक्ष केपी शर्मा ओली र नेकपा एकीकृत समाजवादीका अध्यक्ष माधवकुमार नेपालबीच चर्को आरोपप्रत्यारोप चलिरहेको छ । एक हिसाबले भन्ने हो भने ठूला नेताहरु गालीगलौजमै उत्रिने गरेका छन् । शनिबार ओलीले नेपालमाथि विभिन्न आरोप लगाउनुभएको थियो भने आइतबार नेपालले ओलीमाथि हमला गर्नुभयो ।

ओली भ्रष्टाचारीका ‘संरक्षक’
आफूले चाहँदाचाहँदै काम गर्न नदिएको भनेर आरोप लगाउँदैलगाउँदै केपी ओलीले सरकार छोड्नुपर्यो । म भ्रष्टाचार गर्दिनँ र गर्न पनि दिन्नँ भन्ने उहाँको नारानै थियो । तर एमालेबाट भर्खर अलग भएर नेकपा एकीकृत समाजवादीको अध्यक्ष बनेका माधवकुमार नेपाल भने त्यो मान्न तयार हुनुहुन्न । बरु ओलीनै भ्रष्टाचारीको संरक्षक भएको नेपालको आरोप छ । त्यसका लागि नेपालले भर्खरै महालेखा परीक्षकको कार्यालयले दिएको प्रतिवेदनलाई अघि सार्नुभएको छ ।

विदेशी सामु ओलीले ‘समर्पण’ गरे
प्रमुख प्रतिपक्षी दल नेकपा एमालेका अध्यक्ष केपी शर्मा ओलीले अहिलेको सत्तागठबन्धनले विदेशीको दलाली गरिरहेको र विदेशीको आडमै आफूलाई प्रधानमन्त्रीबाट हटाइएको भनेर आरोप लगाउँदै आउनुभएको छ । शनिबार मात्रै ओलीले पार्टी फुटाउन विदेशीको दलाली गरेको भनेर नेपालमाथि आरोप लगाउनुभएको थियो । तर आइतबार त्यही आरोप ओलीमाथि लगाउनुभयो । शक्तिमा बस्न ओलीले विदेशीका सामू समर्पण गरेको नेपालको आरोप छ ।

ओली ‘व्यक्तिवादी’
नेकपा एकीकृत समाजवादीका माधवकुमार नेपालले ओलीमाथि लगाएको अर्को आरोप हो, ओली व्यक्तिवादी हुनुहुन्छ । ओलीमा आफैलाई पार्टी र सरकार ठान्ने सोच छ । र, त्यसैकारण देश समस्यामा परेको हो भन्ने नेपालको बुझाई छ ।

ओली ‘पदलोलुप’ र ‘बेइमान’
माधवकुमार नेपालमाथि अहिले सबैभन्दा धेरै लागेको आरोप उहाँ पदलोलुप हुनुहन्छ भन्ने हो र , एमाले अध्यक्ष केपी शर्मा ओलीले बारम्बार यसलाई उठाउने गर्नुभएको छ । शनिबार मात्रै ओलीले अध्यक्ष हुनकै लागि नेपालले पार्टी फुटाएको आरोप लगाउनुभएको थियो । तर नयाँ पार्टी बनाएर अध्यक्ष बनेपनि ओलीनै पदलोलुप भएको नेपालको आरोप छ । पार्टीभित्र सहमति गर्ने तर पालना नगर्ने भनेर नेपालले ओलीलाई बेईमान भएको समेत आरोप लगाउनुभयो ।

तत्कालीन नेकपा हुँदादेखिनै शुरु भएको ओली र नेपालबीचको आरोपप्रत्यारोप सहजै रोकिने अवस्था देखिन्न । तर यी आरोप प्रत्यारोपले नेताहरुले आफ्नै साख घटाइरहेका छन् ।