एकताको सबै ढोका बन्द गरेपछि विद्रोह गरेको नेपालको प्रष्टिकरण
४ भदौ २०७८ काठमाडौं । नेकपा एकीकृत समाजवादीका अध्यक्ष माधवकुमार नेपालले एकताका सबै ढोका बन्द गरेपछि बाध्य भएर विद्रोह गरेको दावी गर्नुभएको छ ।
सामाजिक सञ्जाल फेसबुक मार्फत अध्यक्ष नेपालले एमालेबाट अलग भएर नयाँ पार्टी खोल्नुलाई बाध्यता र विद्रोह भन्नुभएको हो । नेपालको कम्यूनिष्ट पार्टी कब्जा गर्ने र समाप्त गर्ने कोशिस भएपछि बाध्य भएर एमालेलाई पूनर्गठन गरी नेकपा एकीकृत समाजवादी बनाएको नेपालले बताउनुभएको छ ।
नयाँ पार्टीलाई सहयोग प्राप्त हुने नेपालको अपेक्षा छ । अध्यक्ष नेपाललाई पूर्वप्रधानमन्त्री झलनाथ खनालले नयाँ पार्टी गठनमा साथ दिनुभएको छ । नयाँ दिल्लीस्थित एपोलो अस्पतालमा उपचार गराइरहेका खनालले नेता नेपाललाई साथ दिने निर्णय जानकारी दिनुभएको हो ।
खनाल नयाँ दर्ता भएको नेपाल कम्युनिष्ट पार्टी एकीकृत समाजवादी को साथ र समर्थनमा रहेको खनालको सचिवालयले जनाएको छ ।
पार्टीका अध्यक्ष नेपालले अहिले नयाँ दलमा साविक नेकपा एमालेका केन्द्रीय कमिटीमा रहेका, विद्रोहका पक्षमा हस्ताक्षर गर्ने र २०७५ जेठ ३ गते पार्टी एकता गर्ने बेला थपिएकाहरूलाई मात्र समावेश गरिएकोमा अब थप केन्द्रीय सदस्य बनाउने पनि नेपालले बताउनुभएको छ ।
एकीकृत समाजवादीमा केन्द्रीय कमिटी ९५ सदस्यीय बनाइएको छ । राष्ट्रिय भेला तथा सम्मेलन गरी केन्द्रीय कमिटीलाई पूर्णता दिने अध्यक्ष नेपाल जानकारी दिनुभएको छ ।
प्रतिक्रिया