प्रधानमन्त्री देउवासँगको भेटपछि डा. केसी अनशन स्थगित गर्न सहमत
२ भदौ २०७८ काठमाडौं । चिकित्सा शिक्षा सुधारका लागि संघर्षरत डा. गोविन्द केसी अनशन स्थगित गर्न सहमत हुनुभएको छ ।
डा. केसीले स्वास्थ्य तथा जनसंख्या राज्यमन्त्री उमेश श्रेष्ठलाई पदमुक्त गर्नुपर्नेसहित पाँच बुँदे राख्दै ३ भदौदेखि आमरण अनशन बस्ने चेतावनी दिनुभएको थियो । तर प्रधानमन्त्री शेरबहादुर देउवाले वार्तामा बोलाएर पाँच बुँदे प्रतिबद्धता जनाउनुभएको हो ।
प्रधानमन्त्री देउवाले स्वास्थ्य राज्यमन्त्रीबारे उपयुक्त समयमा सम्बोधन गर्ने र सार्वजनिक पदहरुमा नियुक्ति गर्दा हुने स्वार्थको द्वन्द्व रोक्न कानून बनाउने प्रतिबद्धता जनाउनुभएको छ ।
प्रधानमन्त्री देउवाले राजमन्त्री नियुक्तिमा त्रुटि भएको स्वीकार गर्नुभएको छ । अब मन्त्रिपरिषद् विस्तार गर्दा माग सम्बोधन गर्ने बचन दिनुभएपछि केसीले तत्कालका लागि अनसन स्थगित गर्नुभएको हो ।
बीपी कोइराला स्वास्थ्य विज्ञान प्रतिष्ठान, धरानका विषयमा भएको सम्झौता कार्यावयन गर्ने प्रतिबद्धता पनि जनाइएको छ ।
त्यस्तै प्रत्येक प्रदेशमा कम्तीमा एउटा मेडिकल कलेज पुर्याउन निर्माण कार्यलाई तीव्रता दिने प्रतिवद्धता पनि प्रधानमन्त्रीबाट भएको छ ।
चिकित्सा शिक्षा ऐनमा संशोधन लगायतका सहमति कार्यान्वयन गर्ने प्रतिबद्धता जनाएकाले सत्याग्रहको कार्यक्रम स्थगित गरिएको डा. केसीले विज्ञप्ति मार्फत् जानकारी दिनुभएको छ ।
प्रतिक्रिया