जातीय विभेदलाई प्रश्रय दिएको आरोप लागेका मन्त्री श्रेष्ठले मागे माफी

१६ असार २०७८ काठमाडौं । जातीय विभेदलाई प्रश्रय दिएको आरोप लागेका शिक्षा मन्त्री कृष्णगोपाल श्रेष्ठले राष्ट्रिय मानव अधिकार आयोग समक्ष गल्ती महसुस भएको बताउनुभएको छ ।

आयोग पदाधिकारीसँगको छलफलमा मन्त्री श्रेष्ठले गल्ती गरेको महशुस भएको र आइन्दा यस्तो गल्ती नगर्ने बताउनुभएको हो । जातीय विभेद गरेको आरोपमा पक्राउ परेकी घरधनीलाई झण्डावाल गाडीमा राखेर लगेपछि मन्त्री श्रेष्ठ विवादमा तानिनुभएको थियो ।

आयोगले सो प्रकरणमा मन्त्री श्रेष्ठलाई कार्यालयमा बोलाएर छलफल गरेको हो । मन्त्री श्रेष्ठलाई बोलाएर हिजो स्पष्टिकरण मागेको आयोगका प्रवक्ता डा. टीकाराम पोखरेलले जानकारी दिनुभयो ।

तनहुँकी रुपा सुनारले जातकै आधारमा आफूलाई कोठा नदिएको भन्दै काठमाडौं बबरमहलकी सरस्वती प्रधानविरुद्ध महानगरीय प्रहरी वृत सिंहदरबारमा उजुरी दिनुभएको थियो ।

उजुरी गरेको ३ दिनपछि प्रधानलाई प्रहरीले पक्राउ गरेको थियो । धरौटीमा रिहा भएपछि प्रधानलाई लिन मन्त्री श्रेष्ठ सरकारी गाडी लिएर पुग्नुभएको थियो ।