पूर्व डीआईजी कोइरालाको सजाय छुटका बारेमा आज सुनुवाइ हुने

११ साउन, २०७७ काठमाडौं। पत्नी हत्यामा दोषी ठहर गरिएका सशस्त्र प्रहरीका पूर्व डीआईजी रञ्जन कोइरालाका सम्बन्धमा भएको फैसलामाथि परेको पुनरावलोकन निवेदनको सर्वोच्च अदालतले आजका लागि पेशी तोकेको छ ।

सर्वोच्च अदालतको अभिलेखअनुसार, गत शुक्रबार दर्ता भएको पुनरावलोकनको निवेदनमाथि आज सुनुवाइ हुनेछ । आजै तीन सदस्यीय इजलासले निवेदनमाथि अध्ययन गरी पुनरावलोकन हुने वा नहुने आदेश गर्नेछ ।

महान्यायाधिवक्ताको कार्यालयले पुनरावलोकनको निवेदन दिएपछि सर्वोच्चले सुनुवाइका लागि पेसी तोकेको हो । चौतर्फी आलोचना भएपछि प्रधानन्याायधीश चोलेन्द्रशमशेर जबराले निवेदन दर्ता हुनासाथ तत्काल सुनुवाइको मिति तोकेर विवादलाई मत्थर पार्ने प्रयास गर्नु भएको हो ।

मुद्दाको पेसी तोक्ने अधिकार प्रधानन्यायाधीशमा हुन्छ । पुनरावलोकनको निवेदनमा सुनुवाइका लागि यति छिट्टै पेसी तोकिएको यो विरलै घटना हो । सर्वोच्च अदालतले निवेदन सुनुवाइमा देखाएको तत्परताले प्रधानन्यायाधीश जबरा र न्यायाधीश तेजबहादुर केसीमाथिको नैतिक दबाब तत्कालका लागि टर्ने देखिन्छ ।

निवेदन सुनुवाइको प्रक्रियामा अघि बढेपछि त्यो विचाराधीन विषय बन्न पुग्ने छ । सैद्धान्तिक रूपमा सर्वोच्च अदालतमा विचाराधीन विषयमाथि अन्यत्र बहस गर्न पाइँदैन । दुवै जनामाथि छानबिन र महाभियोगको मागलाई मत्थर गर्नसमेत सुनुवाइका लागि हतारमा पेसी तोकिएको कानूनका जानकारहरुले बताएका छन् ।

जिल्ला र तत्कालीन पुनरावेदन अदालतले तत्कालीन डीआईजी कोइराला पत्नी हत्यामा संलग्न रहेको ठहर गरी सर्वस्वसहित जन्मकैद सजाय तोकेका थिए।

तर प्रधानन्यायाधीश राणा र न्यायाधीश केसीको संयुक्त इजलासले आठ वर्ष ६ महिना मात्रै कैद सजाय हुने फैसला सुनाएपछि कोइराला बिहीबार कारागारबाट छुटेका थिए ।