नेपालगञ्जमा उपचाररत थप तीन जना संक्रमितको मृत्यु

१४ वैशाख २०७८ बाँके । कोरोना संक्रमणबाट नेपालगन्जमा उपचार गराइरहेका थप तीनजनाको मृत्यु भएको छ ।

हिजो रातीयता बाँकेका दुईजना र दाङका एकजनाको उपचारका क्रममा मृत्यु भएको हो । स्वास्थ्य कार्यालय बाँकेका अनुसार नेपालगञ्ज–३ का २६ वर्षीय पुरुषको नेपालगञ्ज नर्सिङ होमको प्रि–आइसोलेसनमा गएराति मृत्यु भएको छ ।

यस्तै कोहलपुर–१ की ६० वर्षीया महिलाको भेरी अस्पतालमा आज बिहान मृत्यु भएको छ ।

यस्तै दाङको तुल्सीपुरबाट उपचारका लागि नेपालगन्ज मेडिकल कलेज भर्ना भएकी ७४ वर्षीया महिलाको पनि आज बिहान मृत्यु भएको स्वास्थ्य कार्यालय बाँकेका कोरोना फोकलपर्शन तेज ओलीले जानकारी दिनुभयो । योसँगै बाँकेमा कोरोना संक्रमणबाट मृत्यु हुनेको संख्या ९२ पुगेको छ ।

यस्तै कोरोना सङ्क्रमण पुष्टि भएपछि उपचारका लागि विपि कोइराला स्वास्थ्य विज्ञान प्रतिष्ठान, धरानमा भर्ना भएका विराटनगरका एक पुरुषको पनि मृत्यु भएको छ । विराटनगर महानगरपालिका– १५ का ५६ वर्षीय पुरुषको उपचारका क्रममा गएराती मृत्यु भएको हो ।