जसपा सांसद सरिता गिरीद्वारा संविधान संशोधन विधेयकनै खारेजीको माग गर्दै संशोधन प्रस्ताव दर्ता

२८ जेठ, २०७७, काठमाडौं । जनता समाजवादी पार्टीकी सांसद सरिता गिरीले लिम्पियाधुरासहितको नक्सा समेटिएको निशान छापसम्बन्धी संविधान संशोधन बिधेयकनै खारेजीको माग गर्दै संशोधन दर्ता गर्नुभएको छ ।

गिरीले आज संसद सचिवालयमा दिएको संशोधनको सूचनामा स्रोत र प्रमाण नखुलेको भन्दै विधेयकको दफा २ हटाउन भनिएको छ । दफा २ मा मूल संविधानको धारा ९ को उपधार २ सँग सम्बन्धित अनुसूची ३ को व्यवस्था छ।

यो अनुसूचीमा नेपालको नक्सासम्बन्धी व्यवस्था छ।दफा दुईमा नेपालको नयाँ नक्सा बमोजिमको अनुसूची संशोधन गर्नेगरी सरकारले विधेयक प्रस्तुत गरेको छ ।विधेयकमाथि मंगलवार प्रतिनिधिसभामा सैद्धान्तिक छलफल भएको थियो ।र, त्यसमा जनता समाजवादी पार्टीले समर्थन गरेको थियो ।

विधेयकलाई सांसद गिरीले प्रमाण र तथ्यविनाको दावी गर्नुभएको छ । गिरिले भारतलाई नसोधी नक्सा प्रकाशन गरिएको भन्दै यसअघि नै संसदमा विरोध गर्नुभएको थियो । गिरिले केही समय यता लगातार मुलुकको हित विरोधी गतिविधि गर्दै आउनुभएको छ ।