ईपीएलको दोस्रो खेल वर्षाले प्रभावित, पोखरा र भैरहवाले अंक बाँडे (भिडियो रिपोर्टसहित)

१० असोज २०७८ काठमाडौं । एभरेष्ट प्रिमियर लीग (ईपीएल) अन्तर्गत पोखरा राइनोज र भैरहवा ग्लाडियटर्सबीचको खेल नतिजाविहीन भएको छ।

त्रिवि मैदानमा भारी वर्षा भएकाले पोखरा र भैरहवाको खेल नतिजाविहीन भएको हो । खेल नतिजाविहीन भएसँगै दुबै टोलीले एकएक अंक पाएका छन् ।

पोखराले ब्याटिङ गरिरहँदा खेल वर्षाले रोकिएको थियो । त्यसअघि पोखराले १० ओभर १ बलमा ७ विकेट गुमाएर ६५ रन बनाएको थियो ।

यसअघि अन्तिम बलमा राजेश पुलामीले चौका प्रहार गर्दा चितवन टाइगर्सले एभरेष्ट प्रिमियर लिग इपिएलमा विजयी शुरुवात गरेको छ ।

त्रिवि क्रिकेट मैदान कीर्तिपुरमा आज भएको पहिलो खेलमा विराटनगर वारियर्सविरुद्ध चितवनले २ विकेटको रोमाञ्चक जित हात पारेको हो ।

विराटनगरले दिएको १ सय ५२ रनको विजयी लक्ष्य चितवनले पुरै २० ओभरमा ८ विकेट गुमाएर भेट्टायो । जितका लागि अन्तिम ओभरमा २ रन चाहिएको चितवनविरुद्ध विराटनगरका युवा स्पिनर अनिल खरेलले कसिलो बलिङ गरे ।

अन्तिम ओभरको पहिलो बलमा कमल सिंह ऐरीलाई बोल्ड गरेका अनिलले तेस्रो बलमा एक रन खर्चिँदा खेल बराबरी भएको थियो ।

त्यसपछिका दुई बलमा रन बनाउन नसक्दा दबाबमा परेको चितवनका लागि अन्तिम बलमा राजेशले चौका प्रहार गर्दै चितवनलाई जित दिलाए । ३९ बलमा २ चौका र २ छक्का सहित राजेश सर्वाधिक ४३ रनमा नटआउट रहे । बलिङतर्फ विराटनगरका सिकन्दर राजा र करण केसीले २(२ विकेट लिए ।

यसअघि टस हारेर ब्याटिङको निम्तो पाएको विराटनगरले निर्धारित २० ओभरमा ९ विकेट गुमाउँदै १ सय ५१ रन बनाएको थियो । विराटनगरका सिकन्दर राजाले ४७ बलमा २ चौका र ७ छक्का सहित सर्वाधिक ६७ रनको योगदान दिए ।

उनले ३७ बलमा अर्धशतक पूरा गरेका थिए । त्यस्तै, सौरभ खनाल १९ बलमा ३ चौका र २ छक्का सहित ३० रनमा अविजित रहे । चितवनका कप्तान सोमपाल कामी, कमल ऐरी, करिम जन्नत र सागर ढकालले २(२ विकेट लिए ।