सरकारले फेरि बढायो इन्धनको भाउ

२३ जेठ २०७८ काठमाडौं । पेट्रोलियम पदार्थको मूल्य फेरि बढेको छ।

गएरातिदेखि लागू हुने गरी नेपाल आयल निगमले डिजेल, पेट्रोल, मट्टीतेल र आन्तरिक हवाई इन्धनको मूल्य बढाएको हो ।

डिजेल, पेट्रोल, मट्टीतेल र आन्तरिक हवाई इन्धनको मूल्य प्रतिलिटर समान दुई(दुई रुपैयाँले वृद्धि भएको छ । यससँगै पेट्रोल प्रतिलिटर १ सय २५ पुगेको छ भने डिजेल र मट्टीतेलको मूल्य १ सय ८ रुपैयाँ भएको छ ।

उता आन्तरिकतर्फ हवाई इन्धन प्रतिलिटरमा ८० रुपैयाँ भएको छ। निषेधाज्ञाकै अवधिमा निगमले दुई पटक इन्धनको मूल्य बढाएको छ ।

यसअघि जेठ २ गते इन्धनको मूल्य वृद्धि भएको थियो । इण्डियन आयल कर्पोरेशनले पठाएको नयाँ सूचीपछि घाटा बढेको र मूल्य समायोजनको विकल्प नभएको निगमको भनाइ छ ।