प्रधानमन्त्री कप क्रिकेटमा एपीएफले प्रदेश १ लाई १३५ रनले हरायो

Himalaya Television
२०७७ माघ ३ गते १६:३६

प्रधानमन्त्री कप क्रिकेटमा एपीएफले प्रदेश १ लाई १३५ रनले हरायो

३ माघ २०७७ काठमाडौं । विकेटकिपर आशिफ शेखले अर्धशतकीय इनिङ्स खेल्दा विभागीय टोली एपीएफले राजधानीमा जारी प्रधानमन्त्री कप पुरुष राष्ट्रिय क्रिकेट प्रतियोगितामा विजयी शुरुआत गरेको छ ।

कीर्तिपुरस्थित त्रिभुवन विश्व विद्यालयको मैदानमा भएको खेलमा एपीएफले प्रदेश १ लाई १ सय ३५ रनले हराएको हो । २ सय ४४ रनको लक्ष्यसहित जवाफी ब्याटिङ गरेको प्रदेश १ ले खुलेर ब्याटिङ गर्न सकेन । बलियो एपीएफका बलर सामु प्रदेश १ निरीह बन्न पुगेको थियो । ओपनरद्वय दिपक पासवान र मिनास थापाले क्रमश १३ र १८ जोडे । फिर्दोसले १७ रनको पारी खेल्दा दिपेश कँडेलले १६ रन जोड्दा जोशक खड्का १२ रनमा नटआउट रहे प्रदेश १ का ६ ब्याट्स म्यानले दोहोरो अंक जोड्न सकेनन् ।

प्रदेश १ लाई सस्तैमा समेट्ने क्रममा अभिनाष बोहोराले सर्वाधिक ३ विकेट हात पार्दा कमल ऐरी, किशोर महतो र भुवन कार्कीले समान २÷२ विकेट आफ्नो नाममा लेखाए । कप्तान शरद भेषवाकरले एक विकेट हात पारे ।

यसअघि टस हारे पहिला ब्याटिङको निम्तो पाएको विभागीय टोली एपीएफले ४८.४ ओभरमा सबै विकेट गुमाएर २ सय ४३ रन जोड्न सफल भएको थियो । कीर्तिपुरस्थित त्रिभुवन विश्व विद्यालयको खेल मैदानमा एपीएफका लागि ओपनरद्वय आशिफ शेख र सुवास खकुरेलले ७१ रनको सर्वाधिका साझेदारी गरे । आशिफले ५९ रनको अर्धशतकीय इनिङ खेले । आक्रामक ब्याटिङ गरेका आशिफले ३२ बलमा ६ चौका र ५ छक्का प्रहार गरेका थिए ।

आशिफलाई साथ दिएका सुवासले ४१ बलमा १९ रन जोडेर पेभेलियन बाटो फर्किँदा कप्तान शरद भेषवाकरले ३९ बलको समाना गर्दै २० रनको योगदान गरे । प्रदीप ऐरीले ७ रन बनाउन १४ बलको सामना गर्दा एक चौका प्रहार गरे ।

यस्तै सुमित महर्जन २० बलमा १ चौकासहित १४ रन बनाएर आउट हुँदा सन्दीप जोराले ३९ बलमा चार चौकासहित ३० रन जोडे । बसन्त रेग्मीले ५२ बलमा चार चौका र दुई छक्कासहित ४० तथा भुवन कार्कीले ७, कमल ऐरीले ५, किशोर महतो २३ बलमा २ चौकासहित १९ रनको पारी खेले । अविनाश बोहरा ६ रनमा अविजित रहे ।

प्रदेश नम्बर १ का लागि दिपेश कँडेलले १० ओभरमा १ मेडनसहित २९ रन खर्चिएर दुई विकेट लिए । त्यस्तै हेमन्त राईले १० ओभरमा १ मेडनसहित ३४ रन खर्चिएर दुई विकेट लिए ।

त्यस्तै श्रावण यादवले ६ ओभरमा २६ रन दिएर २ विकेट लिएका थिए । फिर्दोस अन्सारीले १० ओभरमा ४० रन खर्चिएर २ विकेट लिँदा जोशक खड्काको नाममा एक विकेट रह्यो ।

प्रतियोगितामा आइतबार दुई खेल हुनेछन् । मूलपानी क्रिकेट मैदानमा विभागीय टोली त्रिभुवन आर्मी क्लबले कर्णाली प्रदेशसँग प्रतिस्पर्धा गर्दा कीर्तिपुरको त्रिवि मैदानमा अर्को विभागीय टोली नेपाल पुलिस क्लबले बाग्मती प्रदेशसँग खेल्नेछ । नेपाल क्रिकेट संघको आयोजनामा तीन विभागीय र सात प्रदेशका टोलीबीच प्रतिस्पर्धा भइरहेको प्रतियोगिता माघ १० गते सम्म सञ्चालन हुनेछ ।


प्रतिक्रिया

Leave a Reply

Your email address will not be published. Required fields are marked *

Latest Programs