बंगलादेशबाट सापटी युरिया मल आउने पक्का
७ असोज, २०७७ काठमाडौं । नेपाल सरकारले बंगलादेशबाट सापटीमा ५० हजार टन युरिया मल ल्याउने पक्का भएको छ ।
बंगलादेशले ५० हजार टन युरिया पैँचोमा दिन लिखित पत्राचार गरिसकेको कृषि तथा पशुपक्षी मन्त्रालयका प्रवक्ता डा हरिबहादुर केसीले जानकारी दिनुभयो ।
बंगलादेशले चितगाउँ बन्दरगाहबाट ५० हजार टन युरिया दिने लिखित सहमति जनाइसकेको छ । उसले त्यहाँको कुन कम्पनीलाई सम्पर्क गरेर दिने भनेर पनि खुलस्त पारेको प्रवक्ता केसीले बताउनुभयो ।
बंगलादेशले सहमति दिएपछि कृषि सामग्रीले एक हप्ताको समय राखेर गत शनिबार टेन्डर खोलिसकेको छ । कम्पनीले रेल, सडकमार्ग र समुद्रीमार्ग कहाँबाट ल्याउँदा सस्तो पर्छ, सोहीअनुसार ल्याउने गरी टेन्डर भर्न इच्छुक ढुवानीकर्तालाई आग्रह गरेको छ ।
कृषि सामग्रीका प्रबन्ध सञ्चालक नेत्रप्रसाद भण्डारीले ढुवानीकर्ता छनोटपछि ७० दिनको समय दिएर बंगलादेशबाट मल ल्याउन सुरु गर्ने बताउनुभयो ।
उहाँका अनुसार ढिलोमा कात्तिक पहिलो हप्तादेखि बंगलादेशी मल भित्र्याउन सुरु गर्ने गरी प्रक्रिया अघि बढाइएको हो ।
प्रतिक्रिया