दलित युवा मृत्यु प्रकरण, रौतहटमा प्रहरी निरीक्षकसहित ३ जना निलम्बित

Himalaya Television
२०७७ भदौ १६ गते १५:५६

दलित युवा मृत्यु प्रकरण, रौतहटमा प्रहरी निरीक्षकसहित ३ जना निलम्बित

१६ भदौ, २०७७, रौतहट । रौतहटको गरुडाका दलित युवा विजयराम चमार मृत्यु प्रकरणमा एकजना प्रहरी निरीक्षकसहित ३ प्रहरी निलम्बनमा परेका छन् ।

प्रहरी हिरासतमा रहेका विजयरामलाई चरम यातना दिएको विषयमा अनुसन्धानका लागि प्रहरी निरीक्षक नविनकुमार सिंहसहित ३ प्रहरीलाई निलम्बन गरिएको हो ।

गरुडा नगरपालिका वडा नम्वर ८ बसविट्टी जिंगडियाका २० वर्षीय निरन्जन रामको हत्या आरोपमा इलाका प्रहरी कार्यालय गरुडाले विजयरामलाई पक्राउ गरेको थियो ।

हिरासतमै बिरामी परेका विजयरामको उपचारको क्रममा मृत्यु भएको थियो । प्रहरीको यातनाका कारण उनको मृत्यु भएको परिवार र स्थानीयको आरोप छ ।

यसबारे अनुसन्धान हुने भएपछि सोधपुछमा संलग्न प्रहरी निरीक्षक नवीन कुमार सिंह तथा प्रहरी हवल्दारद्वय हिरोज मियाँ धुनिया र मन्नु कुमार सिंहलाई निलम्बन गरिएको जिल्ला प्रहरी कार्यालयले जनाएको छ ।

थप अनुसन्धान तथा जाँचबुझ समाप्त नहुन्जेलसम्मका लागि उनीहरुलाई निलम्बन गरिएको हो । भदौ १० गते राति चमारको मृत्यु भएपछि गरुडामा दिनहुँ जसो प्रदर्शन भैरहेको छ ।


प्रतिक्रिया

Leave a Reply

Your email address will not be published. Required fields are marked *

Latest Programs