समाज
पहिरोका कारण सिद्धार्थ राजमार्ग अवरुद्ध
२०७७ साउन १२ गते १२:४७
१२ साउन, २०७७, बुटवल । पहिरोका कारण सिद्धार्थ राजमार्गको बुटवल(पाल्पा सडक खण्ड फेरि अवरुद्ध भएको छ ।
वर्षासँगै राजमार्गको तीन ठाउँमा पहिरो खसेपछि गएरातिदेखि बुटवल(पाल्पा सडक खण्ड अवरुद्ध भएको हो ।
पाल्पाको तिनाउ गाउँपालिकामा पर्ने झुम्सा पुल नजिकै पानी मिल, दोभान नजिकै नाग मन्दिर र माथिल्लो सिद्धबाबा मन्दिर नजिक गएराती पहिरो खसेको थियो ।
सडकखण्ड अवरुद्ध भएसँगै बुटवलबाट पाल्पा, स्याङजा, गुल्मी, कास्की, बागलुङ, पर्वत र अर्घाखाँची जिल्लातर्फ जाने र उताबाट बुटवलतर्फ आउने सवारी साधन बीचमै रोकिएका छन् ।
पानी पर्ने क्रम नरोकिएकाले पहिरो पन्छाएर सडक खुलाउन समय लाग्ने प्रदेश ५ ट्राफिक प्रहरी कार्यालय बुटवलले जनाएको छ ।
प्रतिक्रिया