राजनीति

देउवालाई पार्टीभित्रै भाग मिलाउन सकस, कोइराला समूहले माग्यो ४० प्रतिशत (भिडियो रिपोर्टसहित)

२०७९ भदौ १ गते २१:२६
देउवालाई पार्टीभित्रै भाग मिलाउन सकस, कोइराला समूहले माग्यो ४० प्रतिशत (भिडियो रिपोर्टसहित)

१ भदौ २०७९ काठमाडौं । नेपाली कांग्रेसको १४औँ महाधिवेशनमा पराजित शेखर कोइराला नेतृत्वको समूहले पार्टीभित्र ४० प्रतिशत हिस्सा माग गर्दै दबाब बढाएको छ ।

भ्रातृ संस्थामा नेतृत्व ल्याउँदा सभापति शेरबहादुर देउवाले बेवास्ता गरेको भन्दै कोइराला समूहले राष्ट्रियसभा गृहमा खबरदारी सभा नै गरेर अब चुप नबस्ने चेतावनी दियो ।

–२०७८ चैत ९ मा सभापति शेरबहादुर देउवाले नेविसंघ र तरुण दलमा अध्यक्ष मनोनित गरेलगत्तै शेखर कोइराला पक्षले चैत्र ११ गते गुटको अलग्गै भेला गर्‍यो ।
–केन्द्रीय समिति बैठकअघि २०७९ असार १६ गते शेखर कोइराला पक्षका केन्द्रीय सदस्यहरुको अलग बैठक बस्यो ।
–भ्रातृ संस्थालाई पूर्णता नदिएपछि आक्रोशित कोइराला समूहले बुधबार पार्टी संस्थामा भएको एकाधिकारविरुद्ध खबरदारी सभा गर्‍यो ।

कांग्रेसको १४औँ महाधिवेशनपछि पराजित शेखर कोइराला नेतृत्वको समूहले अलग गतिविधि गरिरहेका यी केही प्रतिनिधिमूलक घटना हुन् । भ्रातृ संस्थामा नयाँ नेतृत्व आउँदा होस् वा स्थानीय तहको निर्वाचनमा टिकट वितरणका बेला धेरै भाग लिन कोइराला समूहले सक्रियता बढाएको थियो । मंसिर ४ गते निर्वाचनको मिति घोषणा भएसँगै पुनः यो समूहको सक्रियता बढेकोछ । बुधबार राष्ट्रियसभा गृहमा खबरदारी सभा गरेरै यो समूहले पार्टीभित्र न्यायोचित हिस्सा नपाए समानान्तर गतिविधि गर्ने चेतावनी नै दिएको छ ।

खबरदारी सभामा कोइराला स्वयं भने सहभागी हुनुभएन । कोइराला समूहबाटै उपसभापति बनेका धनराज गुरुङ र महामन्त्री गगन थापा, सहमहामन्त्रीहरू बद्री पाण्डे, जीवन परियार कोही पनि सहभागी भएनन् ।

कार्यक्रममा कोइराला निकट केन्द्रीय सदस्यहरु किरण यादव, सरिता प्रसाईं, दिनेश कोइराला, प्रतिमा गौतमलगायत पनि नबोली बाहिरिए । पार्टीभित्र न्यायोचित भागबण्डाका लागि खबरदारी सभा भने पनि निर्वाचनको संघारमा देखिएको सक्रियतालाई धेरैले पार्टीभित्र धेरै टिकट लिने कोइराला गुटको रणनीतिका रुपमा हेरेका छन् । तर, कोइराला निकट भने खबरदारी सभालाई लेनदेनको विषयका रुपमा हेर्न नहुनेतर्क गर्छन् ।

केन्द्रीय सदस्य अर्जुननरसिंह केसी प्रमुख अतिथि रहेको खबरदारी सभा शुरु हुँदा जस्तो उत्साह देखिन्थ्यो, केन्द्रीय नेताहरुनै वक्ता नबन्दा भने सहभागीहरु खिन्न देखिन्थे । कतिपय केन्द्रीय नेताहरु भने अहिले खबरदारी सभामा बोल्दा भोलि टिकट खोसिने हो कि भन्ने त्रासमा समेत देखिए ।

कोइराला समूहले पार्टीभित्र बढाउँदै लगेको दबाबले सभापति देउवासँग भ्रातृ संस्था र संसदीय निर्वाचनमा धेरै अंश लिन कोइराला समूह सफल होला वा यो समूह सभापति देउवाको थप कोपभाजनमा पर्ला ? चासोका साथ हेरिएको छ ।

प्रतिक्रिया

Leave a Reply

Your email address will not be published. Required fields are marked *

यो पनि पढनुहोस्