प्रदेश २ को नाम र राजधानीका विषयमा आज मतदान हुँदै
३ माघ २०७८ जनकपुर । प्रदेश २ को नाम र राजधानी टुङ्गो लगाउन आज मतदान हुने भएको छ । त्यसका लागि प्रदेश सभाको बैठक बिहान ११ बजेका लागि बोलाइएको छ ।
प्रदेशसभा बैठकमा प्रदेशको नामाकरण र स्थायी राजधानीसम्बन्धी अध्ययन गर्न गठित विशेष समितिले तयार गरेको प्रतिवेदनमा सहमति जुट्न नसकेपछि मतदान प्रक्रिया शुरु हुने भएको हो ।
गएको पुस १३ गते सभामुख सरोजकुमार यादवको संयोजकत्वमा गठिन समितिले हिजोको प्रदेशसभाको बैठकमा प्रतिवेदन पेश गरेको हो । समितिका सदस्य परमेश्वर साहले आज मतदानबाट नाम र राजधानीको बारेमा निर्णय हुने बताउनुभयो ।
समितिले प्रदेशको नामाकरणका लागि मधेश, जानकी, मध्य मधेश र मिथिला भोजपुरा अनि राजधानीको लागि जनकपुरधाम, वीरगञ्ज (पोखरीया नपा, सिम्रौनगढसम्म), र वीरगञ्ज नपाभरि गरी तीन वटा प्रस्ताव गरेको छ ।
प्रदेश सभामा कुल १ सय ४ सदस्यमा जसपाको ३९, काँग्रेसको १९, लोसपाको १६, एकीकृत समाजवादीका १३, माओवादीका ८ , एमालेका ८ र नेपाल संघीय समाजवादी पार्टीका एक जना प्रदेश सांसद छन् ।
प्रतिक्रिया