कोरोना संक्रमणबाट थप एक जनाको मृत्यु, २७१ संक्रमित थपिँदा २२५ संक्रमणमुक्त

१२ पुस २०७८ काठमाडौं । नेपालमा थप २ सय ७१ जनामा कोरोना संक्रमण देखिएको छ भने थप एक जनाको मृत्यु भएको छ ।

स्वास्थ्य तथा जनसंख्या मन्त्रालयका अनुसार २४ घण्टाको अवधिमा एक जना कोरोना संक्रमितको मृत्यु भएको छ । हालसम्म नेपालमा ११ हजार ५ सय ८६ जना कोरोना संक्रमितको मृत्यु भइसकेको छ ।

देशभरका प्रयोगशालामा गरिएको परीक्षणमा पिसिआर तर्फ २ सय ५१ तथा एन्टिजेन विधिबाट २० जनामा संक्रमण पुष्टि भएको हो । २ सय २५ जना भने संक्रमणमुक्त भएका छन् ।

योसँगै सक्रिय संक्रमितको संख्या ४ हजार ९ सय ३१ मा झरेको छ । आज ५ लाख ६८ हजार ३ सय १९ जनाले कोरोनाविरुद्धको खोप लगाएका छन् ।

नेपालमा हालसम्म पूर्ण र पहिलो मात्रा गरी २ करोड ३७ लाख ४० हजार २ सय ९६ मात्रा कोरोनाविरुद्धको खोप लगाइसकिएको छ ।