कालापनी, लिम्पियाधुरा र लिपुलेक क्षेत्रको पनि जनगणना गर्ने सरकारको तयारी

२९ असोज २०७८ काठमाडौं । राष्ट्रिय जनगणना २०७८ मा कालापनी, लिम्पियाधुरा र लिपुलेक क्षेत्रको पनि जनगणना गर्ने राष्ट्रिय केन्द्रीय तथ्यांक विभागले बताएको छ ।

भदौ ३० गतेदेखि असोज १८ गतेसम्म सञ्चालन भएको घर तथा घर परिवार सुचिकरण कार्यक्रममा भने कालापनी, लिम्पियाधुरा र लिपुलेक क्षेत्रको सुचीकरण गर्न भने नसकिएको विभागले जनाएको छ ।

आगामी कार्तिक २५ देखि मङ्सिर ९ गतेसम्म हुने राष्ट्रिय जनगणना–२०७८ मा भने ति स्थानको गणनाका लागि कूटनीतिक पहल भैरहेको छ ।

कूटनीतिक पहलबाट सम्भव नभए गणनाको लागि अन्य विधि अपनाएर भए पनि गणना गरिने केन्द्रीय तथ्यांक विभाग निर्देशक ढुण्डीराज लामिछानेले जानकारी दिनुभयो ।

नेपाल– भारत सीमामा पर्ने उक्त भूभाग नेपाल पक्षले आफ्नो रहेको भन्दै नक्सामा उक्त भूभाग समेटेको छ । तर, भारतले भने उक्त भू–भाग आफ्नो रहेको भन्दै हस्तक्षेप नीति अपनाइरहेको छ । सरकारले भने कूटनीतिक पहल गरिरहेको बताएको छ ।