जसपामा समस्या आउनुमा सम्पूर्ण रुपमा अध्यक्ष यादव जिम्मेवारः नेता कर्ण (भिडियो रिपोर्टसहित)

१९ जेठ २०७८ काठमाडौं । जनता समाजवादी पार्टीका नेता लक्ष्मणलाल कर्णले पार्टीभित्र उत्पन्न पछिल्लो समस्याका लागि सम्पूर्ण रुपले अध्यक्ष उपेन्द्र यादव जिम्मेवार भएको आरोप लगाउनुभएको छ ।

अध्यक्ष यादवका कारण पार्टीमा विभाजन र कारवाहीको अवस्था आएको कर्णको दावी छ ।

अध्यक्ष यादवले कारवाही गरेको दोस्रो दिन हिमालय टेलिभिजनसँग कुरा गर्दै नेता कर्णले अध्यक्ष उपेन्द्र यादवले मधेसी जनतालाई धोका दिएको आरोप लगाउनुभयो ।

ओली सरकारले माग पुरा गर्दा पनि असहयोग गर्नु मधेशी र थारु जनतामाथि धोका हुने उहाँको तर्क छ । माग पुरा हुने भएपछि मात्रै प्रधानमन्त्री केपी शर्मा ओलीलाई समर्थन गरेको र त्यो कर्तव्य पनि भएको उहाँले बताउनुभयो ।

प्रधानमन्त्री ओलीले सरकारबाट निकालेकाले यादवले प्रतिशोध साँध्न खोजेको कर्णले आरोप लगाउनुभयो । उपेन्द्र यादवलाई सरकार र बाबुराम भट्टराईलाई प्रधानमन्त्री चाहिएकाले समस्या सिर्जना भएको समेत उहाँको दावी छ ।

महन्थ ठाकुरलाई प्रधानमन्त्री बनाउने प्रस्ताव कसैले पनि नगरेको उहाँले बताउनुभयो । ठुलो दलसमेत सरकार चलाउन असफल भएको देखेर आफूहरुले दावी नगरेको पनि कर्णले बताउनुभयो ।

मधेसका माग पूरा गर्ने काममा तल्लीन हुँदा अध्यक्ष यादवले आफुहरुलाई अपराधी जस्तो व्यहवार गरेको समेत उहाँको आरोप छ । अवैधानिक बैठकवाट स्पष्टिकरण र कारवाही हुन थालेपछि बाध्य भएर आफुहरुले पनि यादवलाई कारवाही गरेको कर्णले दावी गर्नुभयो ।

सत्ता समीकरणलाई लिएर चरम विवादमा पछि जनता समाजवादी पार्टी विभाजन उन्मुख छ । दुई पक्षले एक अर्कोलाई पार्टीबाट निष्कासन गरेका छन् ।