बस दुर्घटनामा ९ जनाको ज्यान गएपछि शोकमा दोगडाकेदार गाउँ

२० कात्तिक, २०७७ बैतडी । दशरथचन्द राजमार्गअन्तर्गत बैतडीको पाटन नगरपालिका–८ खोड्पेमा बिहीबार राति भएको बस दुर्घटनामा परी नौ जनाको ज्यान गयो भने ३४ जना घाइने भए ।

सो दुर्घटनामा बैतडीका तीन, दार्चुला, कञ्चनपुर र कैलालीका दुई/दुई जनाको मृत्यु भयो । बैतडीका मृत्यु हुने तीनै जना एउटै गाउँका रहेका छन् । उनीहरु तीनै जना दोगडाकेदार गाउँपालिका ६ सित्तडका हुन् । मृत्यु हुने तीनै जना २५ वर्षदेखि ३० वर्षमुनिका युवक रहेका छन् । मृत्यु हुनेमा दोगडाकेदार गाउँपालिकामा कार्यरत आन्तरिक लेखा परीक्षक कविन्द्रप्रसाद जोशी, नेपाल प्रहरीका जवान रणबहादुर चन्द र करन सिंह ऐरी रहेका छन् । यस्तै सात जना घाइते पनि भए ।

गाउँपालिकाका तीनको मृत्यु र सात घाइते भएपछि दोगडाकेदार गाउँपालिकाले दुख व्यक्त गरेको छ । गाउँपालिकाका अध्यक्ष चक्र कार्कीले शोक वक्तव्य निकालेर दुख व्यक्त गर्नुभएको छ । वक्तव्यमा भनिएको छ, “उक्त घटनाले गाउँपालिका परिवार मर्माहत र शोकमा डुबेको छ । मृतकप्रति श्रद्धाञ्जलिका साथै घाइतेको शिघ्र स्वास्थ्य लाभको कामना छ ।”

एकै वडाका तीन युवकको मृत्यु भएपछि गाउँ नै शोकाकुल बनेको छ । गाउँका होनहार युवाको दुर्घटनामा मृत्यु भएपछि दोगडाकेदार ६ शोकमग्न भएको वडाध्यक्ष लक्ष्मीदत्त जोशीले बताउनुभयो । उहाँले भन्नुभयो, “तिहारको बेला खुशीयाली मनाउनुको सट्टा, गाउँनै शोकमा डुबेको छ”, उहाँले थप्नुभयो, “अन्त्यत्तै दर्दनाक घटना भयो, गाउँमा सन्नाटा छाएको छ ।”

तराई जानका लागि बसमा चढेका उनीहरु कहिले नफर्कने गरेर बिलाएपछि गाउँ नै शोकमग्न भएको स्थानीय नैनसिंह गोयलाले बताउनुभयो । उहाँले भन्नुभयो, “युवा उमेरमै बालबच्चा र छोराछोरी छोडेर तीन युवाको ज्यान गयो”, सँगैका साथी गुमाउँदा निकै पीडा महशुस भएको छ । यो वर्ष तिहार हाम्रा लागि काल बनेर आयो । दोगडाकेदार वडा नं ६ का लागि यो निकै दुखदायी दिन भएको छ”, उहाँले भन्नुभयो ।

दुर्घटनामा परी मृत्यु भएका कविन्द्रप्रसाद जोशी आफ्नी श्रीमती र छोरासँगै महेन्द्रनगर गइरहेका थिए । बस दुर्घटनामा परेपछि जोशी कहिल्यै नफर्कने गरी बिलाएका छन् । एक वर्ष अघि मात्रै लोकसेवा पास गरेका कविन्द्रको परिवार शोकमा डुबेको छ । “यो घटनाले कहिल्यै नभुल्ने घाउ बनाएर गएको छ । कलिलो उमेरमा भतिजाको मृत्यु भएपछि परिवारमा ब्रजपात भएको छ”, कविन्द्रका आफन्त हेमराज जोशीले भन्नुभयो, “एक वर्ष अघि मात्रै सरकारी जागीरमा लागेको थियो । हाम्रो परिवारको होनहार सदस्य गुमाउँदा असह्य पीडा भइरहेको छ । दैवले दिएको चोट सहनुको विकल्प छैन् । ”

कविन्द्रसँगै बसमा सवार श्रीमती र दुई वर्षकी छोरीको डडेल्धुरामा उपचार भइहरेको छ । दोगडाकेदार ६ कै रणबहादुर चन्दको पनि बिहीबार भएकै बस दुर्घटनामा निधन भयो । चन्दको श्रीमती तराई जान लाग्नुभएको थियो । “घाइते बुहारीको डडेल्धुरामा उपचार भइरहेको छ”, मृतकका आफन्त लोकेन्द्रबहादुर चन्दले भन्नुभयो, “तिहारसँगै नयाँ घरमा बसाइ सर्ने गरी जाँदै थिए, यस्तो होला भनेर सोचेका थिएनौ, के गर्ने नसोचेको भयो ।”

दोगडाकेदार गाउँपालिका ६ कै करन ऐरीको पनि आफ्नो कलकलाउँदो उमेर बस दुर्घटनामै गयो । सँगैका साथीको ज्यान गएको खबर सुन्दा निकै दुःख लागेको भुवन कार्कीले बताउनुभयो । श्रीमती र छोरासहित भाइटीकाको लागि माइती घर बेलौरी जान हिँड्नुभएका करन बीच बाटोमै बिलाए । उहाँले भन्नुभयोे, “करन कहिल्यै नफर्कने गरेर छोडेर गए”, करनकी श्रीमती र छोरा घाइते छन् ।

तिहारको समयमा भएको दुर्घटनाले जिल्लामै खल्लो वातावरण भएको छ । चाडपर्वको समयमा धेरै जना आफन्तहरुको भेटघाटमा गइरहेका थिए । यो घटनाले सबैलाई दुखित तुल्याएको बैतडीका सहायक प्रमुख जिल्ला अधिकारी लोकेन्द्रसिंह नेगीले बताउनुभयो । उहाँले भन्नुभयो, “तिहारको बेला भएको ठूलो दुर्घटनाले सबैलाई दुखित बनाएको छ , चाडपर्वको बेला भएको दुर्घटनाले सबैलाई झस्काएको छ,घटनाले सिङ्गो जिल्ला शोकमग्न भएको छ । ”

दुर्घटनामा घाइते ३४ मध्ये गम्भीर घाइते १२ जनालाई धनगढी रेफर गरिएको छ भने बाँकी २२ जनाको डडेल्धुरा अस्पतालमा उपचार भइरहेको छ । बैतडीको गन्नाबाट महेन्द्रनगरका लागि छुटेको पवनदूत यातायातको ना ५ ख ५१४१ नम्बरको बस बिहीबार राति साढे १० बजेतिर दुर्घटनामा परेको हो । सानो घुम्तीबाट बस ६०० मिटर जति तल खसेको छ । साहुसमेत रहेका दोगडाकेदार गाउँपालिका–७ खोचलेकका वीरेन्द्र कार्की पनि घाइते भएको दुर्घटनाको कारण खुल्न नसकेको बैतडीका प्रहरी प्रमुख प्रहरी नायब उपरीक्षक नारायणप्रसाद अधिकारीले बताउनुभयो ।