रौतहटका दुई अलगअलग स्थानमा दुई बालिकाको मृत्यु

१७ असोज, २०७७ रौतहट । रौतहटका दुई छुट्टाछुट्टै स्थानमा दुई बालिकाको मृत्यु भएको छ ।

बृन्दावन नगरपालिकाको उखुबारीमा हिजो साँझ गढीमाइ नगरपालिका वाड नम्बर १ समनपुरका सिताराम साहको १३र१४ बर्षकी सन्जा कुमारी साहको शव फेला परेको छ ।

वृन्दावन नगरपालिका वडा नम्बर ४ पलटुवाटोल मामाघरमा बसेकी सन्जाको सोही गाउँका होस नारायण यादवको उखुबारीमा शव फेला परेको जिल्ला प्रहरी कार्यालय रौतहटका डीएसपी तथा प्रवक्ता भरत श्रेष्ठले जानकारी दिनुभयो । बालिकाको हत्या गरेर उखुबारीमा फालेका हुन सक्ने स्थानीयको आशंका छ ।

यस्तै रौतहटकै यमुनामाई गाउँपालिका वडा नम्बर २ भेडियाहीका राम शंकर राय यादवकी १२ वर्षीया छोरी ममिता कुमारी यादवको खोलामा डुबेर मृत्यु भएको छ ।

खोलामा नुहाउने क्रममा पानीमा डुबेर उनको मृत्यु भएको जिल्ला प्रहरी कार्यालय रौतहटले जनाएको छ ।